ਤਾਜਾ ਖਬਰਾਂ
ਜ਼ਿਲ੍ਹਾ ਅੰਮ੍ਰਿਤਸਰ ਤੋਂ ਇੱਕ ਚਰਚਿਤ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਇੱਕ ਨਿਹੰਗ ਸਿੰਘ ਨੇ ਮੌਲਵੀ ਕੋਲ ਜਾ ਰਹੇ ਸਿੱਖ ਵਿਅਕਤੀ ਨੂੰ ਰੋਕ ਕੇ ਸਖ਼ਤ ਇਤਰਾਜ਼ ਜਤਾਇਆ। ਨਿਹੰਗ ਸਿੰਘ ਭੂਪਿੰਦਰ ਸਿੰਘ ਬੱਗਾ ਨੇ ਰੋਸ ਪ੍ਰਗਟਾਉਂਦਿਆਂ ਕਿਹਾ ਕਿ ਸਿੱਖ ਹੁੰਦਿਆਂ ਹੋਇਆਂ ਲੋਕਾਂ ਦਾ ਮਸਜਿਦਾਂ ਅਤੇ ਮੌਲਵੀਆਂ ਕੋਲ ਜਾਣਾ ਗੁਰਮਤਿ ਦੇ ਉਲਟ ਹੈ। ਉਨ੍ਹਾਂ ਦਾਅਵਾ ਕੀਤਾ ਕਿ ਅਜਿਹੇ ਲੋਕ ਸਿੱਖੀ ਸਰੂਪ ਅਤੇ ਦਸਤਾਰ ਦੀ ਸ਼ਾਨ ਦੇ ਖ਼ਿਲਾਫ਼ ਕੰਮ ਕਰ ਰਹੇ ਹਨ।
ਮਿਲੀ ਜਾਣਕਾਰੀ ਅਨੁਸਾਰ, ਨਿਹੰਗ ਸਿੰਘ ਦੇ ਪਹਿਲਾਂ ਮਨ੍ਹਾ ਕਰਨ ਦੇ ਬਾਵਜੂਦ ਉਕਤ ਸਿੱਖ ਵਿਅਕਤੀ ਛਿਪ ਕੇ ਮਸਜਿਦ ਪਹੁੰਚ ਗਿਆ। ਵਾਪਸੀ 'ਤੇ ਨਿਹੰਗ ਸਿੰਘ ਨੇ ਉਸ ਨੂੰ ਮੁੜ ਘੇਰ ਲਿਆ ਅਤੇ ਮੋਬਾਈਲ 'ਤੇ ਵੀਡੀਓ ਬਣਾਉਂਦਿਆਂ ਪੁੱਛਗਿੱਛ ਕੀਤੀ। ਪੀੜਤ ਵਿਅਕਤੀ ਨੇ ਆਪਣੀ ਸਫ਼ਾਈ ਵਿੱਚ ਦੱਸਿਆ ਕਿ ਉਸ ਦੀ ਮੱਝ ਦੇ ਬੱਚੇਦਾਨੀ 'ਚ ਗੰਢ ਪੈ ਗਈ ਸੀ, ਜਿਸ ਦੇ ਉਪਾਅ ਲਈ ਹੀ ਉਹ ਮੌਲਵੀ ਕੋਲ ਗਿਆ ਸੀ। ਉਸ ਨੇ ਦਾਅਵਾ ਕੀਤਾ ਕਿ ਉਸ ਨੇ ਮਸਜਿਦ 'ਚ ਮੱਥਾ ਨਹੀਂ ਟੇਕਿਆ ਅਤੇ ਨਾ ਹੀ ਕੋਈ ਧਾਗਾ-ਤਾਵੀਜ਼ ਲਿਆ ਹੈ।
ਇਸ ਜਵਾਬ ਤੋਂ ਬਾਅਦ ਨਿਹੰਗ ਭੂਪਿੰਦਰ ਸਿੰਘ ਨੇ ਤੁਰੰਤ ਮੌਲਵੀ ਨੂੰ ਫ਼ੋਨ ਲਗਾ ਕੇ ਇੱਕ ਹਫ਼ਤੇ ਦੇ ਅੰਦਰ-ਅੰਦਰ ਪਿੰਡ ਖ਼ਾਲੀ ਕਰਨ ਦੀ ਚੇਤਾਵਨੀ ਦਿੱਤੀ। ਉਨ੍ਹਾਂ ਕਿਹਾ ਕਿ ਮਸਜਿਦ ਜਾਣ ਵਾਲੇ ਲੋਕਾਂ, ਸ਼ਰਧਾਲੂਆਂ ਅਤੇ ਮੌਲਵੀ ਵਿਰੁੱਧ ਪਿੰਡ ਦੀ ਪੰਚਾਇਤ ਬੁਲਾ ਕੇ ਵਿਰੋਧ ਕੀਤਾ ਜਾਵੇਗਾ।
ਨਿਹੰਗ ਸਿੰਘ ਨੇ ਪਿੰਡ ਦੇ ਗ੍ਰੰਥੀ ਸਾਹਿਬਾਨ, ਪੰਚਾਇਤ ਅਤੇ ਕਿਸਾਨ ਜਥੇਬੰਦੀਆਂ ਨੂੰ ਅਪੀਲ ਕੀਤੀ ਹੈ ਕਿ ਮਸਜਿਦ 'ਚ ਰਹਿ ਰਹੇ ਮੌਲਵੀ ਅਤੇ ਗੁੱਜਰ ਭਾਈਚਾਰੇ ਦੇ ਲੋਕਾਂ ਵਿਰੁੱਧ ਕਾਰਵਾਈ ਕੀਤੀ ਜਾਵੇ। ਉਨ੍ਹਾਂ ਦੋਸ਼ ਲਾਇਆ ਕਿ ਪਿੰਡ ਦੀਆਂ ਕਈ ਔਰਤਾਂ ਦੁੱਧ ਅਤੇ ਪਾਥੀਆਂ ਦੇ ਬਹਾਨੇ ਉੱਥੇ ਜਾਂਦੀਆਂ ਹਨ, ਜੋ ਕਿ ਚਿੰਤਾਜਨਕ ਮੁੱਦਾ ਹੈ।
ਵੀਡੀਓ ਰਾਹੀਂ ਮੌਲਵੀ ਨੂੰ 7 ਦਿਨਾਂ ਦਾ ਸਮਾਂ ਦਿੰਦਿਆਂ ਭੂਪਿੰਦਰ ਸਿੰਘ ਬੱਗਾ ਨੇ ਸਪੱਸ਼ਟ ਕੀਤਾ ਕਿ ਜੇਕਰ ਨਿਸ਼ਚਿਤ ਸਮੇਂ ਤੱਕ ਮੌਲਵੀ ਨੇ ਪਿੰਡ ਨਾ ਛੱਡਿਆ, ਤਾਂ ਪਿੰਡ ਦੇ ਪੁਲ 'ਤੇ ਵਿਸ਼ਾਲ ਰੋਸ ਧਰਨਾ ਦਿੱਤਾ ਜਾਵੇਗਾ। ਉਨ੍ਹਾਂ ਪਿੰਡ ਵਾਸੀਆਂ ਨੂੰ ਇਸ ਮੁੱਦੇ 'ਤੇ ਇੱਕਜੁੱਟ ਹੋਣ ਦਾ ਸੱਦਾ ਦਿੱਤਾ ਹੈ।
Get all latest content delivered to your email a few times a month.
